د رياست الوزرا اقتصادي معاونيت په خپله اکس پاڼه ليکلي، د دغه کمېسیون په نوبتي غونډه کې چې پرون سه شنبه جوړه شوې وه د حق العبور په بدل کې د کابل _ جلال اباد د دويم سرک جوړولو او د ګنو نورو پروژو پر تاييد بحث شوی.
په دغه غونډه کې ياد سرک له اقتصادي معاونيت د حق العبور په بدل کې منظور او د ټولګټو چارو وزارت ته وسپارل شو ترڅو د داوطلبۍ له لارې وو شرکت ته وسپارل شي.
د دغه سرک پروژه داسې مهال منظوريږي چې کابو يوه اوونۍ وړاندې د رييس الوزرا اقتصادي مرستيال ننګرهار ته تللی او هلته يې له ولايتي مسوولينو سره ليدلي وو.
نوموړي همداراز د ننګرهار له زر بستريز روغتون ليدنه کړ وه او د پاتې چارو د بیا پيلېدو ژمنه يې کړې وه.
د کابل _ جلال اباد لاره د هېواد يو له مهمو ټرانزیټي لارو څخه ده، چې د دويم سرک په جوړېدو سره به يې ارزښت نور هم لوړ شي او هم به په دغه لاره ترافیکو پېښو کې د پام وړ کموالي راشي.
