ڪابل (ڪوه نور، ۱۲ جدي ۱۴۰۴): ایران کې د اقتصادي ستونزو د ډېرېدو پر ضد مظاهرې نورو سیمو ته غځېدلي، چې له امله یې لږ تر لږه شپږ کسان وژل شوي او ګڼ شمېر نور ټپیان شوي دي.
د ایران فارس نیمهرسمي خبري آژانس د راپور له مخې، یوازې په لورستان ولایت کې د ازنا ښار په مظاهرو کې درې تنه وژل شوي او ۱۷ نور ټپیان شوي دي.
په خواله رسنیو خپرې شوې ویډیوګانې ښيي، چې خلک شعارونه ورکوي، اورونه بل شوي، ډزې کېږي او مظاهرهچیان د «بېغیرته! بېغیرته!» چیغې وهي.
همداراز فارس مخکې هم ویلي و، چې د ایران په چهارمحال او بختیاري ولایت کې د لوردګان ښار مظاهرو کې هم دوه کسان وژل شوي دي.
سرچینې زیاته کړې، مظاهرهچیانو پر دولتي ودانیو، مسجد، د شهیدانو بنسټ، ښاروالۍ او بانکونو برید کړی و او پولیسو یې د مخنیوي لپاره د اوښکو ګاز کارولی دی.
د فارس خبري اژانس د راپور پر اساس، د دې لاریونونو په ترڅ کې کوهدشت ښار کې هم د مظاهرو پر مهال د امنیتي ځواکونو یو غړی وژل شوی دی.
د لورستان ولایت د والي مرستیال سعید پورعلي ویلي، دغه ۲۱ کلن کس د نظم د ساتنې پر مهال «د بلوهګرو» له خوا وژل شوی دی.
