اقتصادي کمېسيون پرېکړه کړې چې خوست، پکتيا، پکتيکا او لوګر کې د سون لرګيو بار موټرو ته دې د انتقال اجازه ورکړل شي.
د رياست الوزاراء اقتصادي معاونيت په یوه خبرپاڼه کې وايي، د دې کمېسيون د پرېکړه له مخې به د يوې مياشتې جريان کې دې لرګيو ته د انتقال لپاره په ضمانتي ډول اجازه ورکړل شي.
اقتصادي کمېسيون پرېکړه کړې، چې راتلونکي کې به دیو جامع طرزالعمل له مخې دځنګلو دوهل مخنیوی کیږي.
د خوست، پکتيا، پکتيکا او لوګر اوسېدونکي وايي، تېرو څو مياشتو کې، سلګونه پر لرګيو بار موټر یې د ځايي مسوولینو له لوري درول شوي دي.
د دوی په وینا، حکومت اجازه نه ورکوي؛ څو دغه لرګي د پلور لپاره کابل او ځينو نورو سیمو ته انتقال کړي.
د پکتيا ولایت د موټر چلوونکو د معلوماتو له مخې، د دې ولایت مسوولینو تېرو ۵ مياشتو کې د سوخت لرګيو بار ۲۵۰ موټر درولي او د انتقال اجازه نه ورکول کېږي.
دوی وايي، دې موده کې یې ډېر اقتصادي زيان لیدلی دی.
ځايي خلک له حکومت غواړي، چې د یوه ځانګړي طرزالعمل له مخې دې په راتلونکي کې هم د لرګيو د انتقال اجازه ورکړل شي.
