د افغانستان د سوداګري او صنايعو وزارت سرپرست نورالدين عزيزي وايي، چې غواړي افغانستان په رسمي توګه د چین له «یو کمربند او یوې لارې» پروژې سره يو ځای شي.
عزيزي پرون «پنجشنبه د اکتوبر ۱۹مه» له رويټرز خبري اژانس سره په مرکه کې ويلي، چې دوی په رسمي توګه له چین څخه د افغانستان د "یو کمربند او یوې لارې" په پروژه کې د ګډون غوښتنه کړې ده.
هغه زیاته کړې: "موږ له چین څخه غوښتنه وکړه چې موږ ته اجازه راکړي چې د چین-پاکستان اقتصادي دهلیز او د یو کمربند او یوې لارې په نوښت کې برخه واخلو، او نن موږ په تخنیکي مسلو خبرې کوو."
نوموړي ويلي، که بیجینګ موافقه وکړي، افغانستان به د لا زیاتو څېړنو لپاره چین ته یو تخنیکي ټیم واستوي.
نوموړي ویلي چې چین په ټوله نړۍ کې پانګونه کوي او باید په افغانستان کې هم پانګونه وکړي.
عزیزي زیاته کړې: «موږ هر هغه څه لرو چې دوی ورته اړتیا لري، لکه لیتیم، مس او اوسپنه. "افغانستان اوس تر بل هر وخت پانګونې ته چمتو دی."
د يو کمربند او يوې لارې نوښت د ورېښمو د دوو سوداګريزو لارو د څه دپاسه ۷۰ هېوادونو او نړيوالو او پرمختيايي سازمانونو په اقتصادي بنسټونو کې د پانګونې پلان دی چې د چين د ولسمشر شي جين پينګ د بهرنۍ تګلارې مرکز دی.
د سوداګرۍ وزارت سرپرست، په دې وروستیو کې د یو کمربند او یوې لارې په فورم کې د ګډون لپاره چین ته تللی و.
دغه غونډه د پنجشنبې په ورځ پای ته ورسېدله.
