د جوزجان امنيه قومانداني ويلي، د بلخ ـ جوزجان پر لويه لار د يوې ترافيکي پېښې له امله اته تنه وژل شوي او او څلور نور ټپيان دي.
سرچينې ليکلي، پېښه تېره شپه د اقچې ولسوالي اړوند «چکش» سیمه کې رامنځته شوې ده.
همدې حال کې بيا سمنګان کې د يوې ترافيکي پېښې له امله څلور تنه ټپيان شوي دي.
د دغه ولايت د امنيه قومنداني د معلوماتو له مخې، پېښه له سرک څخه د موټر اوښتو له امله رامنځته شوې ده.
هاخوا بيا باميان کې هم د يو موټرسايکل د ټکر له امله يوه ماشومه ټپي شوې ده.
هېواد کې ډېری ترافيکي پېښې د موټر چلوونکو د نه پاملرنې او د خرابو لارو له امله رامنځته کيږي.
ياده دې وي چې څو ورځې وړاندې کورنيو چارو وزارت په يوه اعلاميه کې له هېوادوالو وغوښتل چې د ښي لاس شټرېنګ لرونکو موټرونو له اخيستو دې ډډه وکړي، او د هر ولايت پلېټ لرونکي موټر دې په هماغه ولايت کې وچلول شي.
