د لوړو زده کړو وزارت سرپرست غور ولایت کې یوې غونډې ته د خبرو پر مهال ويلي، چې اوسنی حکومت د عصري علومو مخالف نه دی؛ بلکه غواړي، د پوهنتونو د ظرفيت لوړولو او د زده کړو په برخه کې رغنده ګامونه واخلي.
دغه وزارت په یوې خبرپاڼه کې ليکلي، چې نديم دې غونډې کې د خبرو پر مهال زياته کړه، تیرو شلو کلونو کې د دیني مدارسو او پوهنتونونو تر منځ ډیر واټنونه رامنځته شوي او اسلامي امارت هڅه کوي چې دغه فاصلې ختمې کړي.
نديم ويلي: «غواړو عالم، شیخ، د مسجد خطیب او مجاهد له پوهنتون څخه ملاتړ وکړي او ټول په ګډه د هېواد د آبادۍ او پرمختګ لپاره یو لاس شي.»
شاوخوا یو کال کېږې، چې پوهنتونو کې د نجونو پر زده کړو بنديز لګېدلی دی. که څه هم د اوسني حکومت چارواکي بيا بيا په خپلو څرګندونو کې وايي، چې دا بنديز موقت دی او د ځينو ستونزو تر حل وروسته به نجونو ته د زده کړو اجازه ورکړي؛ خو په دې موده کې يې د هېڅ عملي اقدام څرک نه ليدل کېږي.
د لوړو زده کړو وزارت سرپرست څو ورځې وړاندې له ملي تلوېزيون سره د مرکې پر مهال له ټولو نجونو د حوصلې غوښتنه کړې وه. ده ويلي وو، چې اوسنی حکومت د نجونو د زده کړو مخالف نه دی او په مناسب وخت کې به اجازه ورکړل شي.
